D Saison isch verbii..

Oisi Saison isch nach em Uftritt in Russike jetzt au verbii... Es isch sehr toll, luschtig, asträngend und mängisch au närveufriibend gsi. Au die 9 Noimitglieder hend ihri erschti Saison super überstande und hend sich wacker gschlage. 

Am Mittwuch 20.03.2019 isch oise Noimitgliederabig im alte Sekundarschuelhuus bide Gmeind Hittnau. Abem 19:00Uhr gaz loos... es dörf jede gern verbii cho, sich über oise Verein informiere, Instrumänt uszprobiere und en lässige Abig mit ois verbringe... Mir froied ois uf alle neue und au bekannte Gsichter.

De Sau(st)Ball 2019 isch Gschicht

Phuu was füres Wuchenend. Es isch wiedermal grossartig gsi... Agfange mit de erschte SauBöggete am Fritig abig. Wo de Original SauBögg azüündt worde isch und e rüüdigi Fasnacht vorusgseit hed. Am Samschtig hend sich scho abem 12ii villi Eltere mit Chind ufem Platz vor de MZTH Hittnau parat gmacht um am Chinderumzug teilznäh. Leider heds det e chlyni Grillpanne geh, sodass d Würscht nunig parat gsi sind... für das möchted mir ois numal herzlich entschuldige und werdet das negscht Jahr besser agah. Nachem churze Umzug dur Hittnau hets am Namitag es tolls Programm am Sau(st)Ball JUNIOR geh. Oises huuseigete Saumaskottchen het mit sinere Hirtin dur de Namitag gfüert und d Chind unterhalte. Nebed dere tolle Animation hets au e Malwand, en Fotiegge oder e Sugusschlüüdere geh, wosich d Chind hend chönne ustobe. Am 4i isch denn für di Chlyne schluss gsi, sodass d Halle für die grosse am Abig hed chönne vorbereitet werde.

De Sau(st)ball hed am 7ni sini Tor göffnet und sich i noiem glanz, mitme noie Konzept zeiget. D VIP-Lounge isch dabii de absoluti Hinkucker gsi..Es isch giired, gfäschtet und tanzt wirde bis spaat id Nacht. Am Morge am 4i hemmer na di letschte tanzwüetige müsse userüere.. Aber mir kenned das ja.. en hartgsottene Teil vo de Rampesäu macht au immer bis s Liecht agaht;-) Bis am morge am 8ti hemmer denn mit villne freiwillige Helfer d Halle läärgrumt bevors für 4Stund is Bett gange isch.. Wellmr hend ja am Namitag na de Rescht müsse ufruume. Zume gmüetliche Abschluss vo dem asträngende Wuchenend isches na is Quer ufe feini Pizza gange. Phuu.. das hemmer überläbt.. jetzt chan de "agnehmi" Teil vo de Saison starte. Mir froied ois.

 

Mir sind Rampesäu

Oises noie Motto i de Saison 2018/19 isch: gwohnt andersch... Nächscht Jahr wirds (nöd) besser.

 

NEUNEUNEU!!

D' SauBöggede findet am Fritig abem 5i (en Tag vorem Sau(st)Ball), ufem Vorplatz vode MZH Hittnau statt.
Es git e kei Altersbegränzig und de Itritt isch frei.
Ad Alähnig zum Sächsilüüte wird bi ois en echte SauBögg verbrännt und natürlich gits au bi ois es Wettbüro wo vo 19:00-20:00 offe het und Wette entgägenimmt. Z Gwünne gits natürlich au was.
Gnüssed oies Fiirabigbier bi ois mit Grill und zur Ufwärmig mit Füürschalene.